Kuningan Nu Beuki Ngirut Wisatawan

By : BingkaiWarta - BingkaiWarta, 2016-12-10 14:02:11+07

Kuningan Nu Beuki Ngirut Wisatawan.jpg

Jalur jalan utama di Kabupaten Kuningan tiap ahir minggu pinuh ku kendaraan wisatawan ti luar daerah nu rek pelesiran ka sajumlah tempat wisata di Kuningan

 

Kuningan – Ampir tiap mangsa nyanghareupan poe Saptu, jeung Ahad, atawa ilaharna disebut ahir pekan, sok komo mun ninggang mangsana peré panjang, boh peré sakola, taun anyar, atawa lebaran, geus bisa dipastikeun jalan nu ngagurat di Kabupaten Kuningan, hususna nu aya di lingkungan pariwisata pasti dipinuhan ku mangrupa-rupa kandaraan, timulai motor nepi ka mobil mewah nu datang ti luar daerah.

Maranehna datang lain saukur ti wilyah III Cirebon, malahan mah teu saeutik nu norojol ti Bandung, Jakarta, oge ti luar Jawa Barat, kalayan boga tujuan hayang neuleuman kaendahan alam raya jagat pramudita nu ngampar di tutugan gunung Ciremai beulah wetan, utamana nu aya di obyek wisata unggulan, jiga ODTW Linggarjati Indah, Sangkanhurip, Cabulan, Waduk Darma, jeung sajabana.

Nurutkeun Ketua Perhimpunan Hotel dan Restoran Indonesia (PHRI) Kabupaten Kuningan Hadi Arifin, luhurna minat wisatawan datang ka obyek-obyek wisata nu aya di Kuningan mangrupakeun luang, nu ngabanding reujeung tangtangan keur elemen pangusaha katut pamarentah daerah pikeun nyadiakeun sarana jeung prasarana nu hade.

“Sarana prasarana di Kabupaten Kuningan kudu tersu diwangun, supaya sektor pariwisata bisa leuwih maju. Kajadian lobana macet dina mangsa ahir minggu, mangrupakeun sinyal, yen sarana nu aya di dieu mulai kawalahan ngahareupan terus ningkatna jumlah wisatawan nu daratang,” ucapna.

Hadi nyebutkeun, kajeun ayeuna geus dioperasikeun jalur alternatif Cirebon-Kuningan, tapi hal eta dirasa masih kurang keneh, mun nengetan kana jumlah datangna wisatawan nu beuki dieu beuki loba, “Mun baheula gan saukur turis lokal, ayeuna mah pan teu saeutik urang Jawa Tengah oge nu daratang ka Kuningan,” cek Hadi.

Teu jauh jeung ucapan Hadi, manager Sangkanurip Alami (SA) Agus Wardono ngajelaskeun, yen kaendahan jeung kabeungharan alam Kuningan ayeuna geus nyebar kamamana, dipikiwanoh ku sa nusantara,

“Komo deui lamun promosi potensi wisata Kuningan leuwing ditingkatkeun, supaya nepi ka sakumna masyarakat nu aya di alam dunya, kuring yakin, kahayang ngawujudkeun Kuningan minangka gerbang wisata di wetan Jawa Barat baris tinekanan,” jelasna. (Yud’s)

3 years ago, by BingkaiWarta
Category : BERITA PILIHAN, PERNIK

Kontak Informasi BingkaiWarta.com

Redaksi : redaksi[at]bingkaiwarta.com
Iklan : iklan[at]bingkaiwarta.com











Berita Terkini

Categories